Os plans de Inditex para Pontevedra sufriron un revés. Os problemas xurdidos ao redor dos edificios de Michelena e Gutiérrez Mellado nos que Zara quería construír unha macrotenda levaron á multinacional galega a renunciar a este proxecto.
Zara comunicou ao Concello de Pontevedra que desiste da licenza que solicitou no seu día para rehabilitar os inmobles de Michelena 11 e Gutiérrez Mellado 3 e 5.
Así o confirmou este xoves o alcalde de Pontevedra, Miguel Anxo Fernández Lores, que lamentou que "cuestións privadas" fagan decaer este proxecto.
"En todo caso resaltaría que Zara se interesa por Pontevedra e, a partir de aí, estaremos pendentes da proposta que fagan con posterioridade", sinalou o rexedor.
Fontes consultadas por PontevedraViva sosteñen que Inditex xa estaría a sondar o mercado inmobiliario na cidade para buscar un novo emprazamento para esta macrotenda, na que pretendía unir o tres establecementos da marca: Zara, Zara Man e Zara Kids.
Esta decisión chega despois de que o Tribunal Superior de Xustiza de Galicia denegara, o pasado mes de agosto, a demolición do edificio situado en Michelena 11, un contratempo ao que se lle sumou o xuízo aínda pendente cos comerciantes das Galerías Oliva.
Zara presentara en xuño de 2023 a solicitude de licenza para construír esta macrotenda.
A intención da compañía era crear un complexo comercial de máis de 6.000 metros cadrados, repartidos en oito plantas, cun investimento próximo ao dez millóns de euros.
O proxecto contemplaba o aproveitamento dun soto, que probablemente sería o almacén, un baixo para regular a altura dos dous edificios, outro cinco plantas e un baixo cuberta.
En todo este espazo, ademais de reunir ás tres tendas de Zara na cidade, Inditex pretendía situar as oficinas administrativas do grupo para toda a área de Pontevedra.