Tras máis de dous meses de mobilizacións, a folga na xustiza galega podería estar vivindo as súas últimas horas. A Xunta de Galicia chegou a un preacordo coa maioría dos sindicatos para poñer fin a este conflito laboral. O pacto deberá ser ratificado agora polas asembleas de traballadores convocadas para este venres nas sete grandes cidades galegas.
O acordo, asinado entre o goberno galego e representantes de UGT, CCOO, USO e CSIF -7 dos 11 membros da mesa de negociación-, establece que os funcionarios da xustiza en Galicia verán incrementado o complemento autonómico en 135 euros ao mes no caso dos xestores, 127 nos tramitadores e 122 nos auxiliares.
A suba producirase en tres anos, a razón do 50% este mesmo exercicio, o 30% en 2019 e o 20% restante en 2020.
A maiores, inclúese unha cláusula de revisión que garante que os traballadores manterán unha posición por riba da media dos territorios con competencia en materia de xustiza.
Tamén se prevé a posta en marcha dun plan de actuación, que deberá ser consensuado co Tribunal Superior de Xustiza de Galicia e a Fiscalía, para recuperar o traballo atrasado durante a folga e poñer ao día na medida do posible aos xulgados galegos. Ao dito plan, que terá carácter voluntario, poderán acceder a xeneralidade dos funcionarios.
O acordo inclúe así mesmo outros puntos con melloras para os funcionarios como a consolidación das prazas de reforzo de máis de tres anos de duración, a creación de novas prazas, melloras nos xulgados de violencia de xénero e a ampliación do permiso por maternidade e paternidade e dos supostos de baixas nas que perciben o 100% das retribucións.
A administración tamén se comprometeu a deixar sen efecto os expedientes disciplinarios incoados por mor da folga e a que os descontos pendentes no salario, por secundar os paros, sexan repartidos de xeito proporcional nos meses restantes do ano, incluída a paga extra.