O Consello da Xunta celebrado este luns autorizou a contratación para a subministración dun total de 66 ecógrafos con destino aos diferentes servizos do Hospital Novo Montecelo.
O Executivo galego destinará un investimento de 5.023.315 euros á compra deste equipamento.
Distribuído en 13 lotes, o expediente inclúe a dotación de ecógrafos para os servizos de xinecoloxía e obstetricia, uroloxía, cardioloxía, radiodiagnóstico, aparato dixestivo, pediatría, traumatoloxía, anestesioloxía, UCI, reumatoloxía, urxencias, rehabilitación, pneumoloxía, medicina interna, nefroloxía, coidados paliativos, otorrinolaringoloxía e neuroloxía.
Ademais, tamén se adquire equipamento para a realización de ecoendoscopias dixestivas e ecobroncoscopias.
A ecografía é un procedemento de diagnóstico por imaxe que permite ver órganos e estruturas brandas dentro do corpo. Mediante este procedemento pódese visualizar calquera parte do corpo identificando con claridade a forma e tamaño de cada estrutura do seu interior.
Por outra banda, estes equipos ofrecen a posibilidade de estudar os distintos tecidos do corpo, como é o caso do fluxo sanguíneo de arterias e veas para detectar arteriosclerose e coágulos; analizar a glándula tiroides e outras estruturas brandas do pescozo; de tendóns, ligamentos, músculos e estruturas das articulacións; das glándulas mamarias ou para o estudo pelviano.
Ademais, actualmente as ecografías pódense combinar con outros procedementos como punción con agullas para biopsia, endoscopios, e outros equipamentos dando lugar a imaxes de fusión.