Doce persoas sentarán no banco dos acusados por un delito de contrabando de embarcacións constitutivas de xénero prohibido pola súa implicación nunha organización que construía narcolanchas que se usaban para transportar haxix desde Marrocos até as costas españolas.
A organización criminal tiña epicentro en Arousa e caeu nunha operación dirixida polo Equipo contra a Delincuencia Organizada e Antidroga (EDOA) da Garda Civil de Pontevedra con máis dunha vintena de detidos.
Finalmente, a maxistrada do Xulgado de Primeira Instancia e Instrución número 4 de Cambados decretou a apertura de xuízo oral e deu por formulada a acusación contra doce persoas e instou o sobresemento provisional respecto de dous investigados, ao non terse formulado acusación contra eles.
A xuíza tamén acordou manter a liberdade provisional das persoas acusadas, mantendo tamén as medidas cautelares que en cada caso atópanse vixentes contra cada unha delas.
O caso chegará a xuízo na Audiencia Provincial de Pontevedra, unha vez que contra este último auto da xuíza non cabe posibilidade de recurso.
O fiscal formulou acusación contra os doce. Para tres deles solicita penas de sete anos de prisión. Para un, pide cinco anos e tres meses. Para cinco pide catro anos e nove meses. Para un pide catro anos e medio e para os outros dous pide tres anos e nove meses.
No caso de tres deles, cualificou os feitos como constitutivos dun delito de contrabando de embarcacións de xénero prohibido cometido por medio de persoas, entidades e organizacións, derivándose unha especial facilidade para a súa comisión.
Nos outros nove, a Fiscalía ve un delito de contrabando de embarcacións constitutivas de xénero prohibido realizado a través dunha organización.
A un dos acusados, ademais, impútalle un delito de tráfico de drogas das que non causan grave dano á saúde.
Os feitos que se xulgarán producíronse entre xaneiro de 2021 e abril de 2022 e investigounos o EDOA tras ter coñecemento da existencia dun colectivo organizado de persoas dedicado, de forma concertada e constante no tempo, á subrepticia fabricación, equipamento, posta a punto, distribución e entrega de embarcacións semirríxidas de alta velocidade constitutivas de xénero prohibido.
Esas narcolanchas posteriormente eran empregadas para a conclusión de operacións marítimas de transporte de sustancias estupefacientes con destino ás costas españolas.
