Visto para sentenza quedou esta mañá o xuízo contra Jesús J.R.C., coñecido como O Briso, acusado de causar a morte dun home e deixar ferido a outro no transcurso dun tiroteo que se produciu o 5 de xaneiro de 2013 no barrio do Con (Moaña).
A Fiscalía elevou a definitivas as súas conclusións e solicitou que sexa condenado a 23 anos e medio de prisión ao entender probada a súa culpabilidade nos delitos de homicidio, homicidio en grao de tentativa e tenencia ilícita de armas. Ademais, pide que se indemnice ao fillo do falecido con 181.000 euros e a F.M.G., o home que resultou ferido aquela noite no tiroteo, con case 25.000 euros polos danos e as secuelas que arrastra desde entón.
Neste sentido, a fiscal Carmen Novo afirmou que o acusado "hizo bien en no declarar" durante a vista oral, porque cualificou o seu testemuño na fase preliminar de instrución como "bastante incoherente y absurdo". Asegurou que no xuízo quedou demostrado que O Briso disparou tanto ao falecido como ao amigo que lle acompañaba cando ambos se presentaron no seu domicilio do Con para, segundo testificou este último no xuízo, reclamarlle unha débeda
Ademais deste testemuño, sobre o que a fiscal apreciou que "non tiña contradicións", Carmen Novo rexeitou tamén a posibilidade suxerida pola defensa de que a noite do crime estivese presente unha cuarta persoa, xa que "la única versión que habla de ello es la del acusado y no hay nada que lo avale".
De feito, unha das persoas que compareceu hoxe como testemuña negou participar no crime como suxeriu a avogada de O Briso.
O home explicou que el mesmo presentouse no cuartel da Garda Civil "porque estaba cansado de oír que había una persona más y que era yo", pero que os axentes, tras confirmarlle que lle investigaban, aseguráronlle que non era sospeitoso. O seu único vínculo con este asunto, dixo, foi que M.G.A., a vítima do crime, estivera esa mesma noite no seu domicilio para pedirlle diñeiro.
Nesta última xornada do xuízo tamén prestaron declaración os forenses que fixeron a autopsia ao falecido, que sinalaron que presentaba dúas feridas de bala no tórax e que os disparos se produciron a curta distancia; e os axentes da Policía Científica que examinaron o lugar do crime, que confirmaron este extremo ao achar residuos das detonacións na vítima e no ferido e analizar as traxectorias dos disparos.