"Ir de Celita" era garantía en Vilaboa de contar cun bo traxe. Pero non só iso. A actividade profesional de Celia Janeiro Currás como costureira era todo un acto social. De aí que Vilaboa pensara nela para distinguila co Premio 8M que o Concello entrega desde hai tres anos.
A Casa de Cultura de Riomaior acollerá este sábado, ás 19:00 horas, a entrega a 'Celita' deste premio, co que se homenaxea as mulleres anónimas que co seu quefacer diario facilitaron a incorporación da poboación feminina no rural ao desenvolvemento e dinamización de Vilaboa.
En tempos nos que a alta costura estaba reservada para familias privilexiadas, esta muller de Figueirido fíxose un oco na sociedade pontevedresa. Celia Janeiro pode presumir de ter utilizado fío e agulla con tanto arte e destreza que nunca lle faltou clientela esixente.
O seu gusto pola moda levouna a dirixir o que hoxe sería unha academia de corte e confección.
Nos tempos de 'Celita', era un taller polo que pasaron centenares de mozas de Vilaboa dispostas a aprender un oficio artesanal que en moitos casos lles facilitou un medio de vida compatible coa conciliación familiar.
Esta muller emprendedora e decidida estivo á fronte durante anos da súa propia tenda de telas nas Galerías Oliva en Pontevedra, converténdose nun referente no seu momento debido á diversidade de xéneros que traballaba e sobre todo á calidade da materia prima que ofrecía.
Ademais, no seu taller reuníanse mulleres de distintos lugares que, mentres cosían ou se vestían, compartían experiencias, aconsellábanse e dábanse ás nas súas roupas e nas súas vidas.
A homenaxeada nesta edición é tamén unha persoa activa na construción da vida cultural e social de Figueirido.
Instigadora nalgúns casos e colaboradora noutros, 'Celita' formou parte do histórico grupo de activistas que participou na loita contra a empacadora e contribuíu na creación do coro de San Andrés de Figueirido e do grupo infantil de baile galego.
Ese espírito inquedo e ese sentido de comunidade continúan hoxe en día a pleno rendemento, xa que a súa constancia favoreceu que toda a veciñanza de Figueirido desfrute das clases de memoria e pilates.
O acto de entrega do premio comezará con vídeo sobre a homenaxeada, que recibirá unha escultura da colección 'Muller das Salinas', obra de Irene Silva Xiráldez, que representa unha figura feminina erguida cunha pá para achandar o sal na man.
Tras a entrega, a tarde continuará con música e teatro. A mestra de guitarra da Escola de Música de Vilaboa Elena Almudena López-Rubio Asensio interpretará tres pezas e a continuación, ás 20:00 horas, porase en escena unha obra de teatro sobre Rosalía de Castro.
