Por terceiro mandato consecutivo, María Ramallo gobernará Marín con maioría absoluta. Iso si, nunca antes cunha marxe tan ampla con respecto aos seus rivais. O PP logrou unha vitoria incontestable ao alcanzar o 55,55% dos votos. Seus serán quince dos vinte e un concelleiros da corporación marinense.
A actual alcaldesa logrou, por tanto, catro edís máis dos que tivo este últimos catro anos, tras crecer sete puntos en apoio popular.
O PSOE de Manuel Pazos queda co consolo de que, polo menos, tamén melloraron os seus resultados electorais. Os socialistas sumaron o 20,60% dos votos e terán cinco edís. É un máis dos que lograran nas eleccións de 2015.
O terceiro partido que logra representación no Concello é o BNG, aínda que moito máis reducida que ata agora. Dos tres concelleiros nacionalistas que había en Marín lograron reter só un, o que ostentará a súa candidata Lucía Santos. Foi apoiada polo 7,21% dos marinenses, oito puntos menos que na última cita coas urnas.
Iso si, tres votos máis lle darían o seu segundo concelleiro, á conta dun dos quince que obtivo o PP de María Ramallo.
Sen dúbida, gran parte do apoio perdido polo BNG foi para a formación que xurdiu tras a escisión que os nacionalistas sufriron no último mandato. Ser de Marín, liderados por Miguel Ángel Lema, levou o 4,26% dos votos, insuficientes para acceder á corporación.
Trátase dun resultado moi similar ao que logra Marea de Marín, que cede os seus tres edís, ao perder dous terzos do seu apoio nas urnas en 2015. Sumaron o 4,52% dos votos. Tamén quedan fóra Podemos e Cidadáns, cun 3,77% e un 3,18% de apoios respectivamente.