Que as vodas son cada vez menos encorsetadas é un feito. E que, tras a cerimonia, cada vez máis noivas optan por desfacerse do zapato de tacón e cambialo por unhas zapatillas para poder bailar cómodas, case unha moda. Pero a pontevedresa María Soledad Acuña Casais, Mary para os amigos, foi un paso máis aló e non é que bailara en Converse. É que foi nelas xa ata o altar.
Non son unhas zapatillas calquera. É o seu calzado favorito, o que viste a diario e do que case ten unha colección. E, para a ocasión, personalizounas e adaptounas para que combinaran ben co seu traxe de noiva.
As Converse coas que se deu o "si quero" nunha cerimonia no Castelo de Soutomaior encargounas en Italia e teñen escrita a data da voda, 20 de abril de 2024, e as iniciais dela e do seu xa marido, Carlos.
Tenas na casa xa desde hai meses, pois foi previsora e encargounas en Italia xa o día 3 de agosto e chegáronlle con marxe suficiente, o día 14 dese mes. Este sábado, estreounas.
A data está na zona posterior e as iniciais, M e C, nos cordóns. Son brancas, acordes á cor do vestido, e non lle faltaban detalle. Con elas, sentiuse máis ela, fiel ao seu estilo mesmo o día da súa voda.
Mary, de 36 anos, non sempre foi tan amante das zapatillas. Sempre as utilizou, pero anos atrás o seu estilo era diferente. "Pasei a ter unha colección de tacóns con 20 anos a ter unha colección de Converse", explica, aínda que rapidamente matiza que os zapatos de tacón si eran unha colección, as Converse, non, tan só que conta con moitos pares porque "é o calzado que máis utilizo".
Por iso non quixo prescindir delas o día da súa voda, consciente de que o seu é case unha excepción porque xa as levou na cerimonia, pois a maioría das noivas póñenlle ao vestido primeiro un tacón e logo cámbiano polas zapatillas para o baile nupcial ou para a festa posterior.
"O típico é casar con tacóns e eu omitino", indica. E engade que foi unha recomendación do lugar no que comprou o vestido, pois "tan só ía poñerme tacóns unha hora e sabía seguro que ía cambiarme. Pareceume unha bobada". Desta forma, "estou todo o evento en Converse". Aí está a súa singularidade. Con todo, o seu marido, para a cerimonia, si optou por un zapato clásico de noivo.
O "si quero" de Mary e Carlos foi fiel á personalidade de ambos, pero non tan personalizado como lles tería gustado.
Ambos son moteiros e, tras nove anos de relación, querían que toda a súa voda fose moteira, expoñendo a foto dela no lugar da comida e cos ruxidos dos seus amigos sobre dúas rodas, pero non foi posible porque no Castillo de Soutomaior non lle permitiron que acudisen os seus amigos motoristas a realizar unha concentración, acelerar e facer ruxir os seus vehículos.
Descartada esa voda moteira, si foi con este estilo a pedida de man. Foi nunha concentración moteira en Marín. "Foi unha sorpresa", explica Mary. "Estaba na concentración e leáronma, cantáronme e todo", engade.