Primeiro incendio forestal do ano na comarca de Pontevedra. Durante a pasada madrugada, a Xunta de Galicia tivo constancia do inicio dun lume na parroquia de Caroi, en Cerdedo-Cotobade.
Segundo a información facilitada pola Consellería do Medio, o incendio declarouse ás 1.06 horas da madrugada e continiaba activo ao mediodía deste martes.
O lume foi estabilizado ás 14,11 horas e deuse por controlado ás 19.02 da tarde.
Segundo as últimas estimacións afecta unha superficie de arredor de 30 hectáreas. Mobilizáronse para a súa extinción 2 técnico, 11 axentes, 25 brigadas, 14 motobombas, 1 pala, 2 avións e 3 helicópteros.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085.