Unha compañía con sede social en Poio impulsa un proxecto inmobiliario para incrementar o parque de vivendas turísticas en Pontevedra. Sería cun edificio de nova construción que estará situado nunha parcela actualmente sen uso, na Rúa dos Irmáns Nodal.
Este inmoble, no corazón do barrio de San Roque, ocupará unha parcela de 56 metros cadrados e terá dúas plantas e baixo. Contará con catro apartamentos de uso turístico.
En total, a superficie construída chegará ata os 288 metros cadrados.
Tres dos apartamentos terán 31,3 metros cadrados e o cuarto, algo máis pequeno, 25 metros cadrados e catro máis de terraza. O baixo, pola súa banda, destinado principalmente a almacén, sumará outros doce metros cadrados.
Neste proxecto, os promotores investirán 131.000 euros.
Os técnicos municipais autorizaron que o edificio non conte con prazas de aparcamento no seu soto, debido á estreiteza da parcela. Recibirá licenza en breve e os seus responsables terán un prazo máximo de dous anos para completar a súa construción.
Actualmente, en aplicación da normativa municipal, Pontevedra só concede licenzas para vivendas turísticas en baixos ou primeiras plantas de edificios residenciais ou, na súa falta, en inmobles destinados integramente a este tipo de apartamentos.