O sindicato UGT volveu a saír á rúa o 1 de maio, Día Internacional do Traballo, en solitario. Como ocorreu o ano pasado, a unión sindical que no resto de España convoca manifestacións conxuntas con CCOO nesta data rompeu en Pontevedra, deslucindo a reivindicación.
Este mércores convocáronse na cidade catro manifestacións diferentes, de UGT, CIG, CCOO e CGT, todas entre as 11.30 e as 12.45. A de UGT partiu dos locais sindicais da rúa Pasantería e, tras pasar pola praza da Ferrería, tivo que agardar antes da Peregrina a que pasase a de CIG. A imaxe, que xa ocorreu en anteriores ocasións, evidenciou a división sindical na cidade.
A reivindicación de UXT contou cunha ampla representación política do PSOE local, coa senadora Marica Adrio, a deputada Paloma Castro e os concelleiros Iván Puentes, Yoya Blanco e Manuel Fariña. Ademais, tras a pancarta principal demandando "pleno emprego", situáronse as reivindicacións doutros colectivos como a seguridade privada, as empregadas do fogar ou os traballadores de Inditex.
Ramón Vidal, secretario comarcal do sindicato, encarou a xornada "con moitos ánimos" para pesar do mal tempo, pois xusto empezou a chover ás 12.00 horas, momento no que saíu a súa mobilización, e insistiu en que é "unha data de celebración, pero, sobre todo, reivindicación".
A asistencia, menor á de CIG ou CCOO, non o desmoralizou e confía en que "o ano que vén sexamos máis" e a poboación se dea conta de que "na rúa é onde se conseguen moitos logros, moitos moitos logros".
A súa reivindicación central deste 2024 é o "pleno emprego", pero insisten en que "non un emprego calquera, un emprego de calidade, un emprego de menos horas, xornadas máis pequenas e mellores soldos".
Ademais, demandan unha "cobertura pública" que ampare a toda a poboación e, en especial, a "aqueles sectores que están máis desfavorecidos agora mesmo", desde a sanidade ata a asistencia no fogar, a atención ás familias cun membro con necesidades especiais ou as persoas xubiladas.
Vidal percibe nas novas xeracións unha menor mobilización colectiva e considera que é pola falta de conciencia do complicado que foron algúns logros e o fácil que será perdelos. No centro de menores Avelino Montero no que el traballa, por exemplo, conseguiron moitas melloras en seguridade e protección e estabilidade "a base de mobilización" e "con moito esforzo e moita loita dos compañeiros".
Iso é o que quere trasladar ás novas xeracións, "que parece que todo vén dado e non nos vén dado; e retírasenos rapidamente. Notan unha debilidade e aí están á volta da esquina para coller e para retirarnos parte do conseguido".