Os servizos autonómicos de prevención de incendios seguen no punto de mira por cuestións relativas ás súas condicións laborais. A polémica, que saltou este outono a raíz da vaga de lumes da fin de semana do 15 de outubro, segue viva e agora o sindicato UGT denuncia que, a 15 días de que empece o ano 2018, o persoal descoñece os seus cadros de traballo.
A situación afecta aos traballadores do Servizo de Prevención e Defensa contra Incendios Forestais da Xunta de Galicia para a provincia de Pontevedra, arredor dos que UGT denuncia "abandono" e "falta de negociación" por parte da xefatura territorial da Consellería de Medio Rural.
Segundo a información facilitada por UGT, Medio Rural non levou aínda á mesa de negociación os cadros de traballo que distribúen os medios e horarios que van a cubrir durante todo o 2018.
O sindicato leva anos solicitando á xefatura territorial a negociación e a adaptación das carteleiras de traballo a os acordos establecidos, tanto a nivel provincial como autonómico, pero ata agora sempre fixo "caso omiso". Esta actitude, segundo UGT, "leva a crear desigualdades entre o persoal e unha cobertura deficiente do servizo debido a eivas na distribución dos medios dispoñibles".
De feito, lembran que a inspección de traballo xa ditaminou a favor dos traballadores e instou á xefatura do servizo a negociar anualmente as carteleiras de traballo tal como tamén establece o convenio colectivo aplicable, pero, a pesar desas indicacións, "seguen a cometerse os mesmos erros e a falta de negociación das quendas de traballo tradúcese en irregularidades nas carteleiras".
Esas quendas non están ben feitas, o que motiva, segundo UGT, dous problemas. Para os traballadores o problema é que provoca dificultades para conciliar a súa vida laboral e familiar e para o servizo, que non ten unha distribución de medios adecuada.
UGT esixe que se adopten as medidas necesarias para negociar unhas carteleiras equitativas adaptadas á normativa vixente, recollida no convenio colectivo, cos seus descansos por vacacións e rotacións correspondentes, para que os traballadores poidan ter a súa carteleira anual igual que nas demais consellerías, que xa negociaron coa correspondente antelación.