Chegamos a unha nova entrega de"A cociña gourmet en conserva" da man de Conservas Pescamar cunha proposta sinxela ideal como aperitivo nestes meses de verán e onde aproveitaremos todos os beneficios dun dos peixes máis exquisitos e demandados: o bonito do norte.
O bonito do norte é un peixe azul rico en graxa saudable, xa que contén unha gran cantidade de ácidos graxos poliinsaturados. A esta calidade, hai que engadir os efectos beneficiosos para a saúde cardiovascular da súa presentación en aceite de oliva.
Para preparar unhas deliciosas Tostas de verán con bonito do norte Pescamar necesitamos os seguintes ingredientes:
- 6 rebandas grosas de pan
- 1 lata de bonito do norte en aceite de oliva Pescamar
- aceite de oliva virxe extra
- 1 dente de allo
- sal
- 2 tomates
- queixo mozarella
- cebola
- follas de alfábega
- pementa negra
- olivas negras
Preparación:
Comezamos a receita preparando a cobertura das tostas. Nun bol introducimos os tomates cortados en anacos pequenos, así como a cebola, o queixo e parte das follas de alfábega, todo iso tamén picado. Esparexemos un pouco de pementa negra e cubrimos co líquido da lata de bonito do norte en aceite de oliva Pescamar. Mesturamos suavemente os ingredientes e deixamos repousar tapados na neveira para que vaian collendo o sabor.
Tostamos as rebandas de pan nunha grella. A continuación, untámolas co aceite de oliva e o dente de allo. Engadimos un chisco de sal a cada tosta.
Sobre cada rebanda poñemos unha parte de bonito do norte en aceite de oliva Pescamar e outra da mestura que tiñamos na neveira. Coroamos cuns toros de olivas negras e unha folla de alfábega.
En dúas semanas, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.