Pilar Bértolo é unha muller nova que acaba de superar un cancro de mama. Este xoves se atopaba no posto da asociación Adicam na entrada de consultas externas do Hospital Provincial. Alí informaba neste Día Mundial contra o Cancro de Mama ás persoas interesadas sobre as axudas que presta este colectivo. Un colectivo que para Pilar foi fundamental para atopar apoio e axuda para facer fronte á enfermidade.
Explica que o 16 de marzo diagnosticáronlle cancro de mama. "Tiña un vultiño no peito e pensaba que non era nada. Cando fun ao médico díxome que era un carcinoma. Foi un shock", relata explicando que inicialmente "estás perdidísima". Por este motivo buscou axuda. Atopouna en Adicam, asociación especializada en cancro de mama e xinecolóxico.
Alí descubriu a persoas como Tere Barros, directiva do colectivo, que explica que funcionan como unha familia e sinala que a asociación con sede en Cangas, Moaña, Vigo e Pontevedra conta xa con 2.000 persoas asociadas. Desenvolve diferentes programas como Apálpate ou encontros en zonas do rural con persoas ás que se lles traslada información sobre a importancia da detección precoz da enfermidade.
"Elas axudáronme", afirma Pilar Bértolo, que foi operada nas últimas semanas e leste mesmo xoves presumía de que acababan de retirarlle todos os puntos da intervención. "Desapareceu o tumor",explica satisfeita, despois de varios meses de incerteza.
Esta mesma mañá, ela informaba a outras persoas recentemente diagnosticadas de cancro de mama sobre as actividades de apoio que realiza Adicam. "O que facemos é orientar cando unha persoa está no lio porque nós tamén pasamos o mesmo", expón Tere Barros.
VOLUNTARIA DA AECC: "O QUE ACONSELLO É NON ILLARSE"
Na entrada central do Hospital Provincial están situadas outras dúas voluntarias, neste caso da Asociación Española contra o Cancro (AECC), ofrecendo información sobre o cancro de mama ás persoas interesadas.
"Facemos fincapé na investigación e na necesidade de recadar para loitar contra o cancro", indica María Otero, voluntaria da AECC en Hospitais na área de Oncoloxía. "Avanzamos moito. Os tratamentos son menos agresivos, avanzaron aínda que queda aínda bastante por percorrer", indica engadindo que a porcentaxe de curación no cancro de mama se elevou notablemente nos últimos anos. "Os hospitais fan un labor súper importante. Antes non se involucraban tanto. Agora todos os equipos sanitarios implícanse", argumenta.
"Hai que verbalizarlo", engade, "tratamos de non darlle ese dramatismo habitual. Hai moitas voluntarias que padecen a enfermidade e iso axúdanos", indica María Otero, que recoñece que se logrou que o cancro xa non sexa un tabú e explica que na AECC de Pontevedra hai profesionais, psicólogos e traballadores sociais, ademais do voluntariado, que axudan ás persoas que se enfrontan á enfermidade.
Este tumor é o máis frecuente en mulleres con idades comprendidas entre 45 e 65 anos
"O que aconsello é non illarse para estar fortalecida mentalmente", apunta para lembrar que a asociación conta con programas de ioga, terapias e programas específicos tanto para pacientes como para familiares.
A Asociación Española contra o Cancro reivindica nesta xornada que "O Rosa é máis que unha cor", unha idea que promove os avances fronte ao cancro de mama. Este tumor é o máis frecuente en mulleres con idades comprendidas entre 45 e 65 anos no mundo e trátase do terceiro tipo de cancro con maior incidencia.
Segundo os datos do Observatorio do Cancro, en 2022 na provincia de Pontevedra foron diagnosticadas 758 persoas de cancro de mama. A AECC demanda máis información entre a poboación sobre o cancro de mama tripla negativo, o máis agresivo e con máis capacidade de proliferación.
En 2022, a Asociación atendeu a un total de 2.927 persoas, entre pacientes e familiares, na provincia. O 20% estaban relacionados co cancro de mama.