A Autoridade Portuaria de Marín e outras institucións participaron este venres nun simulacro de emerxencia en augas da Ría de Pontevedra.
A situación que se supuxo foi a dun incendio nunha embarcación deportiva cun ferido grave que requiso evacuación nas inmediacións da Illa de Tambo.
Segundo indicaron desde a Autoridade Portuaria, o suposto incendio declarouse na embarcación Faros del servicio de Señales Marítimas, preto do faro de Tenlo Chico.
Para o rescate da persoa ferida participou o helicóptero de Salvamento Pesca I e o buque Irmáns García Nodal coa súa lancha auxiliar, que remolcou a porto á embarcación deportiva tras quedar sen goberno.
A coordinación da emerxencia correu a cargo de Salvamento Marítimo de Vigo e, ademais do persoal e medios propios da Autoridade Portuaria, participaron Emerxencias de Galicia 112, Servizo de Gardacostas da Xunta de Galicia, Capitanía Marítima de Vigo, Distrito Marítimo de Marín, Servizo de Resgardo da Garda Civil do Porto de Marín, Servizo Marítimo da Garda Civil, Corporación de Prácticos do Porto e a empresa Amare Marín.
Entre os obxectivos de realización deste simulacro, destacaron a coordinación cos distintos medios de emerxencias, a formación do persoal participante, a valoración da capacidade de resposta e colaboración ante unha emerxencia ou a verificación de que se realiza unha transición ordenada e eficiente das operacións normais ás de emerxencia.