Os datos de ocupación da época estival en Sanxenxo foron realmente bos, cunha porcentaxe dun 78% que supón 18 puntos por encima en comparación co ano pasado en leste mesmo período, segundo a enquisa realizada polo CETS entre os asociados.
O presidente do Consorcio de Empresarios Turísticos de Sanxenxo, Alfonso Martínez, valorou "positivamente o traballo realizado e os resultados obtidos" e destaca que os meses de "xullo e agosto traballamos moi ben, a primeira quincena de setembro foi un pouco máis frouxa do esperado pero en conxunto facemos un balance moi bo, a teor das circunstancias nas que seguimos traballando".
Ademais, resaltou as cifras de agosto, "que permitiron non só superar con fartura as cifras da demanda turística do mesmo mes do ano pasado se non quedar a só cinco puntos de alcanzar a cifra de noites rexistradas no agosto de 2019". Concretamente, Sanxenxo tivo un 21% máis de viaxeiros e case un 38% máis de pernoitas.
A fidelidade dos viaxeiros tamén foi algo que destacou o presidente dos empresarios cunha media de catro xornadas, fronte á ocupación media galega, que rolda as dúas xornadas.
PRIMEIRA QUINCENA DE SETEMBRO
Os aloxamentos marcaron unha ocupación media do 54%, case 8 puntos superior ao mesmo período do ano pasado pero lonxe aínda de cifras récord do verán de 2019, en que se alcanzou unha ocupación do 76%. "Quizá esperabamos algo máis de setembro pero traballamos ben no conxunto da tempada estival, o balance é positivo", apuntou Alfonso Martínez, valorando especialmente o regreso dun bo número de viaxeiros que volveron escoller Sanxenxo para pasar o seu tempo de vacacións.
Os hoteis de catro estrelas volveron ser os que mellor porcentaxe de ocupación marcaron, cun 77%, seguidos dos hoteis de tres e dúas estrelas (63% e 56%, respectivamente). Os apartamentos, hoteis dunha estrela e cámpings marcaron os resultados máis baixos.
A pesar diso, Martínez quixo destacar o esforzo do conxunto dos empresarios por "seguir xerando empregos, vitais para a economía do municipio", destacando precisamente que "o municipio empregou máis persoal nos hoteis de Sanxenxo no mes de agosto que outros municipios como Santiago, aínda en Ano Santo, o que demostra o peso específico da capital turística das Rías Baixas no conxunto galego e a fortaleza do destino sol e praia".
Por último, Alfonso Martínez valorou a capacidade de adaptación do sector turístico en canto á adaptación dos establecementos ás novas normas e condicións sanitarias.