A localidade de Sanxenxo despide este xoves a un dos seus veciños máis queridos, Eugenio Vidal Santos. O seu funeral terá lugar ás cinco e media desta tarde no Templo Novo.
O seu falecemento tivo lugar o mércores aos 91 anos de idade.
Eugenio tiña tres fillos: María Eugenia, María Isabel e Román, e oito netos. Era un home sinxelo, moi traballador, sempre disposto a axudar aos seus veciños e estaba namorado da súa vila natal onde foi o impulsor da famosa Festa da Cebola.
Traballou durante anos como director da oficina que a Caixa de Aforros de Pontevedra tiña nesta localidade.
No ano 1936, os seus pais, Román e Amalia, abriron unha casa de comidas en Padriñán, moi preto do Pazo de Miraflores. En 1955 fundaron Casa Román no lugar onde está situada actualmente, levantando sobre o local tamén un hotel.
Anos despois, en 1982, Eugenio e a súa querida esposa Maruja Alonso, inauguraron o restaurante en Pontevedra co mesmo nome e a mellor tradición familiar da gastronomía galega. O prato favorito de Eugenio era o guiso de rodaballo.