Dúas persoas foron identificadas como os autores do roubo dun sobre con 3.800 euros que estaba no interior dun bar de Pontevedra, ao que accederon tras romper o cristal da porta coa tapa dun sumidoiro.
Un dos autores do roubo, segundo informou a Policía Nacional, atópase xa en prisión desde o pasado 17 de outubro; mentres que o segundo, un home de 37 anos natural da Coruña, foi detido na tarde de onte mércores.
A ambos se lles investiga como presuntos autores dun roubo con forza en establecemento.
Os feitos producíronse na madrugada do pasado 15 de outubro e os axentes, tras ser alertados por unha chamada ao 091, acudiron ao bar, situado no centro histórico de Pontevedra, e descubriron que a porta de acceso estaba fracturada.
No chan había unha tapa de sumidoiro coa que os autores do roubo lograron romper o cristal e entrar no interior do bar.
A caixa rexistradora do local estaba forzada e o propietario do bar denunciou que lle faltaba un sobre con 3.800 euros.
A investigación policial permitiu a identificación destas dúas persoas e o que non estaba en prisión foi posto a disposición xudicial tras ser localizado nas inmediacións da praza da Ferrería.