Un problema nunha válvula dun tubo de 500 milímetros orixinou incidencias no servizo de auga na zona de Marín e Bueu desde o domingo, segundo admite o Concello de Pontevedra. A avaría rexistrouse na condución de alta ocasionando que se paralizase o servizo.
Foi necesario pechar a rede e abrir a canalización alternativa que parte do depósito de Castrosenín, unha solución que xa se empregou no caso doutras avarías previas, segundo a información municipal. Mentres se repara o tubo afectado, o servizo de Bueu e Marín, que tamén afecta as instalacións portuarias garántese a través deste depósito de Castrosenín, que pasará a estar plenamente operativo cando finalicen as obras do Gran Montecelo.
A ZONA ALTA DE SEIXO, A MÁIS AFECTADA
Desde o Concello de Marín, o goberno local indica que o fallo se detectaba durante a mañá nalgúns puntos da vila. Os servizos municipais avisaron á Brigada de Augas que se atopaba de garda. A través do enxeñeiro municipal, detectaron o fallo na tubaxe do litoral e contactaron con Viaqua, que é a empresa concesionaria do servizo en Pontevedra, que informaron da localización da avaría na zona das Corbaceiras.
Segundo indican desde o goberno de María Ramallo, puxéronse en marcha todos os labores precisos para abastecer a tubaxe da parte alta, que corresponde coa instalación de Acuaes, a través do depósito de Pardavila. Sinalan que seguirán traballando durante toda a noite para continuar garantindo unha subministración de auga en condicións para a poboación e as instalacións empresariais.
As partes máis afectadas foron as zonas altas de Seixo. A partir do mediodía deste luns xa contaban con presión suficiente grazas ás rápidas intervencións. En Marín, as varaciones de presión provocaron unha pequena rotura na Rúa Gago de Mendoza, que tamén está a se arranxar, segundo o Concello.
Por outra banda, os depósitos municipais de Pedreiras, Cadrelo e Pardavila atópanse en perfecto funcionamento. Cando finalicen as obras de mellora que se realizan actualmente tamén se sumará o dA Costa.