Aproveitando as obras de pavimentación que se están executando na barriada da Virxe do Carme, o goberno municipal de Marín abordará unha actuación que, a pesar de ser sinxela, cambiará a fisonomía da zona e a mobilidade de todo este ámbito.
Así, o Concello creará sendas peonís no entorno das vivendas, redistribuíndo o estacionamento e evitando que se xeren situacións de risco como pasa na actualidade.
As portas das casas ou ben están invadidas por coches aparcados, dificultando a visión para quen sae, ou caen directamente nun viario no que hai tráfico rodado.
Estas sendas crearanse a través da sinalización horizontal, aproveitando que é preciso facer todo o repintado.
Marcaranse para delimitar o espazo reservado únicamente aos peóns e separándoo do tráfico rodado, tendo en conta que esta zona residencial ten unha enorme afluencia de persoas que camiñan.
Ademais da propia veciñanza que vive na barriada, hai numerosos desprazamentos a pé para acceder a puntos de atracción de poboación tan importantes como o centro de saúde, o CEIP Sequelo, o pavillón ou as hortas urbanas.
Ante esta situación, o Concello considera "imprescindible" mellorar a mobilidade e a seguridade en todo o ámbito da barriada, creando itinerarios seguros para residentes e visitantes.
Este proxecto foi analizado nunha visita técnica que a alcaldesa de Marín, María Ramallo, e a concelleira Marián Sanmartín, fixeron á zona acompañadas do xefe da Policía Local, dos técnicos municipais e de representantes da empresa adxudicataria.