O Concello de Soutomaior acollerá, por primeira vez, un foro sobre memoria histórica.
Será este venres 8 e sábado 9 de novembro no Multiusos de Arcade, cunha programación que abarca desde varios coloquios e exposicións até a proxección dun documental e a representación dunha peza teatral.
Todo nunhas xornadas que se titularon 'Recuperar para construír'.
O I Foro sobre Memoria Histórica de Soutomaior comezará ás 17.00 horas coa apertura das exposicións 'Acorda' e 'Reixa', que se poderán visitar tanto o venres como o sábado entre as 17.00 e as 21.00 horas no salón de actos do Multiusos.
O venres ás 20.00 horas proxectarase o documental 'Acorda'.
Posteriormente, ás 21.00 horas, terá lugar o coloquio 'O papel das institucións públicas no proceso de recuperación'.
Será coa participación do alcalde, Manu Lourenzo; o deputado autonómico Luís Bará; a ex deputada de Memoria Histórica da Deputación de Pontevedra, María Ortega; e a deputada no Congreso, Marica Adrio.
En canto ao sábado, a compañía Os Quinquilláns representará a obra teatral 'A señora de Forcadela', baseada na vida de Josefa García Segret, mestra represaliada no franquismo.
Ademais celebrarase o coloquio 'Espertar a memoria' coa xornalista e escritora Montse Fajardo, a historiadora Natalia Jorge Pereira, a actriz Tero Rodríguez e o tamén historiador Xosé Álvarez Castro.