A Asociación de Amigas e Amigos do Museo de Pontevedra presentou este venres as alegacións á Resolución da Dirección Xeral de Patrimonio Cultural pola que se incoou o procedemento para declarar Ben de Interese Cultural o Pazo de Lourizán.
O documento presentado interesa a ampliación da delimitación do monumento, do seu contorno de protección e da zona de amortecemento para preservar o maior número de elementos patrimoniais posíbeis e que o conxunto teña maior uniformidade interpretativa e de protección xurídica.
Solicítase, xa que logo, a incorporación das parcelas estremantes co Pazo, así como as vías de acceso do predio, con especial atención á marxe Oeste, onde se sitúa a verxa de fundición que pecha o predio. Asimesmo, interésase a incorporación á zona de amortecemento dos terreos de dominio público marítimo-terrestre onde se asenta ENCE, polo que afecta ao monumento que se pretende declarar BIC.
Súmanse ás reivindicacións a inclusión no BIC do conxunto de mobles, obras de arte e documentos, tanto ubicadas no propio pazo como noutros lugares -como o Museo de Pontevedra ou os Xardíns de Vincenti-. Ao tempo, a AMUPo considera necesaria a redacción dun Plan Director que recolla detalladamente a evolución da propiedade, conteña os danos patrimoniais sufridos e asegure as intervencións precisas para a restauración e rehabilitación do conxunto, respectando ao máximo a concepción histórica do mesmo.
Esta decisión, tomada no seo do Plenario extraordinario celebrado esta semana, foi precedida da elección dun novo Consello Reitor para o periodo 2023-2027.
Nesta sesión Ernesto Vázquez-Rey foi reelixido como presidente da entidade, incorporándose como vicepresidente o arqueólogo Mateo Fontán. O novo secretario xeral será o historiador da arte Daniel Lucas Teijeiro e tesoureira Raquel Puente. Completan o órgano reitor como vogais Eloy Martínez, Cristina Quinteiro, Ángel Arcay e Ciara Cabodevila, quen xa facían parte do Consello Reitor.