Marín deixa de pertencer ao perímetro conxunto que formaba con Pontevedra e Poio. É a principal consecuencia das novas medidas anunciadas este mércores polo presidente Alberto Núñez Feijoo e que entrarán en vigor na medianoite do xoves ao venres.
"Insistimos en que as reunións sexan dun máximo de catro persoas, tanto en espazos abertos como pechados. E que non se reúnan en domicilios, que é o problema que temos e detectamos durante o Nadal", pediu a alcaldesa María Ramallo aos seus veciños despois dun novo día de contaxios á alza que sitúa en 63 o número de casos activos no municipio morracense.
Ademais de non poder desprazarse a Pontevedra, os marinenses só poderán acudir a aqueles municipios que teñan o mesmo nivel de alerta que Marín. Con todo, a rexedora pide aos seus veciños "que queden en casa e saian só para facer actividades esenciais. Estamos nun punto que é bo previr para que entre todos podamos baixar este incremento, que é lento e máis pequeno que noutros sitios", tranquilizou a popular.
O toque de queda, como no resto de Galicia, pasa a ser ás 22 horas e a hostalería poderá seguir abrindo ata as 18 horas cun aforo máximo do 30 % no interior e do 50 % nas terrazas.