Os protagonistas destas Conversas na Ferrería son alumnos do CEIP do Carballal de Marín, que esta mesma semana realizaron unha intensa visita á Real Academia Galega para recibir o premio conseguido co "Casares ton".
O centro presentouse á primeira edición do concurso "Contádenos o voso Día das Letras" realizando un videoclip e unha curta baseada no poema "Amemos" de Carlos Casares. A profesora de Educación Física, Paloma Pazos, encargouse de deseñar unha coreografía e o profesor de música Víctor Alfonso Castro compuxo a melodía usando ritmos de reggaeton.
Antes da citada recepción na RAG contamos nos estudos de PontevedraViva Radio coa directora do centro, Maite Méndez e o profesor de Música, Víctor Castro. Con eles e seis destes alumnos, que cursan quinto e sexto curso: Noa Lubián, Hernán Penas, Iago Villanueva, Anxo Recamán, Telma Solla e Sara García.
Non era a primeira vez que musicaban un poema, o ano pasado xa o fixeron con Manuel María, "así que este ano tentamos seguir na mesma liña, pero dando unha volta de tuerca e implicando a toda a comunidade educativa", comenta Víctor. Estiveron uns dous meses preparando o proxecto. O baile, din os rapaces que non lles custou moito e aprender a canción "non foi complicado pero tampouco fácil".
Os catro anos que levan traballando no Obradoiro de Audiovisuais está a ter resultados moi exitosos. Este premio da RAG é un dos múltiples que O Carballal está a conseguir: este ano viaxaron a Madrid para recibir un premio no Festival eMove polos vídeos "O cole que queremos" e de novo o "Casares ton". Con outro traballo, "Ou monstro de cores" levaron un premio Videoghit convocado polo IES de Silleda Pintor Comeiro. E este mesmo 24 de outubro acudiron a Ourense ao certame de cinema OUFF Escola, no que quedaran finalistas con varios vídeos.
"Non queremos que o éxito non se nos suba á cabeza. O obxectivo de participar nestas convocatorias é que nos sirva para seguir traballando e para que os nenos gocen de experiencias novas", indica Maite Méndez.
A fórmula de tanto recoñecemento é evidente: a ilusión e interese que o profesorado conseguiu transmitir aos alumnos. A directora do centro o compendia así: "somos un centro vivo. Partimos de actividades motivadoras para que os rapaces aprendan dunha forma diferente. Entendemos que a memorística ten moita importancia, pero en realidade teñen que saír preparados para a vida, para ser capaces de resolver os problemas que van xurdindo sen conflito e sen frustración".
Basta botar unha ollada ao blogue O recuncho de Tambo para comprobar que o que nos contaron é tal cal o contaron.