Unha redución de soldo de ata o 16% e un recorte do 66% nos complementos que reciben. Iso para o que resta de 2013. Para o próximo ano, sería do 15 e do 33 por cento, respectivamente. Son as rebaixas salariais que, segundo denuncia o comité de empresa, quere impoñer La Voz de Galicia aos seus traballadores. Unha formulación que se atopou co rexeitamento frontal do persoal do histórico xornal.
Por iso é polo que inicien unha serie de mobilizacións para que a empresa retire a súa proposta. Os traballadores da Delegación de Pontevedra de La Voz de Galiciasumáronse este martes a estas concentracións de protesta que, por terceiro día, leváronse a cabo diante de todos os centros de traballo que este medio de comunicación ten por toda Galicia.
Cun cartel alusivo ao recorte salarial co lema "Non á proposta do -66%", os xornalistas pontevedreses protagonizaron unha concentración, durante a hora do café, ante as súas oficinas na rúa Rosalía de Castro.
O comité de empresa de La Voz de Galicia asegura, a través do blog que crearon para denunciar a súa situación laboral, que esta rebaixa salarial que propón a empresa no proceso de negociación que acaba de abrir ao amparo da reforma laboral, é "insultante e humillante".
Denuncian que, fronte a esta medida unilateral de "africanización de salarios", La Voz de Galiciagañou máis de medio millón de euros no exercicio de 2012, e que durante a negociación do convenio en 2011, os traballadores "xa fixemos graves sacrificios". Neste sentido, explican que fronte a unha redución de soldo dun 14%, os salarios de alta dirección "creceron nalgún caso ata case un 12%".