O Concello de Pontevedra informa este domingo que a pasada fin de semana, a Policía Local de Pontevedra tivo que intervir no campo de fútbol de Príncipe Felipe.
O motivo era garantir a seguridade dun árbitro que recibira ameazas por parte dun pai dun dos xogadores.
O incidente ocorreu o sábado 2 de novembro, arredor das14.30 horas, cando o árbitro solicitou a presenza policial ante o temor de ser agredido polo espectador.
Segundo explicou o árbitro aos axentes, durante o transcurso do partido, un dos pais dun xogador que xogaba o encontro insultouno e ameazouno con agredilo, chegando a dicirlle que o esperaría á saída do campo.
Grazas a que coñecía persoalmente ao pai, o árbitro puido proporcionar a súa identificación.
A Policía Local acompañou o árbitro na súa saída das instalacións e comprobou que a persoa identificada non se atopaba xa nos arredores, permitindo así que o árbitro abandonase o lugar con tranquilidade.
A Policía Local lembra que este tipo de condutas, aínda que non constitúen delito, son absolutamente reprochables desde o punto de vista cívico.
Os axentes policiais indican que estas accións están moi afastadas da educación que deben recibir os máis pequenos.