Durante os dous próximos días, o 24 e o 25 de febreiro, o Concello acometerá obras de mellora e mantemento en catro puntos da cidade. Será na Avenida da Estación, na Avenida de Marín, en Loureiro Crespo e na Rúa Alemaña, segundo informa o goberno municipal.
Os traballos, que inclúen reasfaltados e melloras do firme das rúas entre outros, serán pequenas actuacións que provocarán certas limitacións de tráfico durante algunhas horas.
Na Avenida da Estación, durante o día de mañá, ocuparase parte dun carril, sen corte de tráfico, a partir das 09.10 horas. Estímase que estará rematado ao longo da mañá e permitirá a finalización da dársena dun autobús.
Pola súa banda, os operarios tamén actuarán na glorieta entre Loureiro Crespo e a Avenida de Lugo, dentro das obras de reforma urbana do barrio. É probable que se habiliten desvíos puntuais da circulación por diferentes carrís da rotonda.
A terceira das zonas nas que se estará traballando este 24 de febreiro será a Rúa Alemaña. A partir das 15:00 horas faranse traballos de mellora, complementarios a actuacións realizadas con anterioridade na intersección coa rúa Luxemburgo. Estará permitido o paso de turismos.
Xa o venres día 25, as obras serán na Avenida de Marín. No seu sentido de saída, a partir das 09.10 horas, pechará o carril de saída da PO-12 cara Marín, realizándose un desvío por Manuel del Palacio.
Serán traballos de parcheado, de cara a unha proba ciclista que haberá en marzo.
No carril de entrada á cidade esta mesma actuación realizarase durante a quenda de tarde. Non se limitará a circulación, pero estará pechado un dos carrís de entrada.