A Subdelegación do Goberno en Pontevedra activou un dispositivo especial de vixilancia ante a previsión de nevadas que anuncia a Axencia Estatal de Meteoroloxía (AEMET) desde mañá sábado, día 7, ata o martes 10 de decembro.
O subdelegado do Goberno, Abel Losada, informou este venres da preparación do operativo, coordinado co subsector de tráfico da Garda Civil.
Os axentes centrarán a súa atención en tres puntos críticos da provincia: o alto de Fonte Fría (A-52), na zona do túnel do Folgoso; O Paraño, na estrada N-541 entre Pontevedra e Ourense; e o alto de Santo Domingo, na N-525 ao seu paso polo Deza.
O dispositivo reforzarase especialmente o domingo 8, coincidindo coa operación retorno da ponte festiva.
Ademais, establecerase un programa de atención especial nos accesos a Vigo, non tanto pola previsión de neve senón polas condicións climáticas adversas e a elevada afluencia de visitantes prevista estes días, segundo indicou Abel Caballero.
Os equipos de mantemento das estradas dispoñen xa do sal necesario para actuar en caso de precipitacións en forma de neve.
O protocolo activarase no momento en que comecen as nevadas, cun incremento da presenza de axentes da Garda Civil de Tráfico nas zonas afectadas.