Coa demolición das xardineiras comezou este xoves na praia de Panadeira o acondicionamento do espazo onde se habilitará unha nova pasarela para facilitar o acceso para persoas con mobilidade reducida.
En total ocupa unha superficie de 73,5 metros cadrados. Está previsto que estes traballos duren dúas semanas.
A actuación enmárcase dentro da liña de axudas do Embelecemento do Litoral Galego.
Nesta subvención tamén se inclúe a renovación dun tramo de 150 metros de pasarela en Areas, nestes momentos en execución, que transcorre pola beira do río Pintillón até a entrada da praia. Ademais, mellorarase a protección do espazo dunar ao elevar o novo paseo cincuenta centímetros.
Ademais, na praia de Canelas habilitouse un novo itinerario peonil na zona norte do areal, co obxectivo de recuperar o sistema dunar e eliminar a circulación rodada.
Construíuse unha pasarela elevada de 50 centímetros sobre a actual rasante da duna e da zona de acceso rodado. Ademais, colocarase unha varanda para mellorar a seguridade no acceso. A actuación inclúese dentro da subvención do Fondo de Compensación Ambiental.
O Concello de Sanxenxo executa estas tres actuacións cun investimento total que supera os 167.000 euros.
