O presidente local e portavoz municipal do Partido Popular de Pontevedra, Rafa Domínguez, mantivo un encontro cun grupo de veciños de Bora no que lles garantiu a súa "colaboración total para saldar a débeda que o Concello de Pontevedra arrastra, desde hai moito tempo", co saneamento da parroquia e a zona do Quinteiro.
O PP local continúa o seu periplo polo rural pontevedrés co que quere lanzar a mensaxe de que "as parroquias da cidade levan anos abandonadas polo alcalde e os concelleiros do BNG, co apoio dun PSOE cada vez máis dócil".
Segundo traslada o Partido Popular os veciños reclamaron ao goberno local que invista no benestar e a calidade de vida dos residentes en Bora que, "anos despois de pagar o enganche, aínda están sen saneamento".
Acompañado polos concelleiros populares Martín Martínez e Beatriz Rey, Domínguez denunciou "a manifesta falta de preocupación por un rural con peores servizos, a pesar de pagar os mesmos impostos, con colectores en malas condicións, falta de roza, cunetas sen limpar e mobiliario público roto ou deteriorado".
Por último, o Partido Popular de Pontevedra anuncia que este 2025 vai "intensificar" as reunións veciñais para "seguir demostrando que a prioridade para o PP de Pontevedra son todos eles".