Alfonso Cuarón, o director e produtor mexicano de cinema, é un dos invitados que estará presente entre este xoves 15 e o martes 20 no Festival de Arquitectura e Cidade Mextrópoli, que se desenvolve en Cidade de México. Acudirán, entre outros, importantes relatores como os tres arquitectos premio Pritzker 2017, os directores da Bienal de Venecia e de Chicago, así como varios membros do goberno mexicano.
Entre a representación internacional vai atoparse unha expedición pontevedresa, formada por catro integrantes e liderada por Miguel Anxo Fernández Lores, alcalde da cidade, que permanecerá desde o domingo ata o martes neste evento.
A concelleira de Promoción Económica, Anabel Gulías, mostraba a súa satisfacción porque a organización de Mextrópoli e o goberno mexicano teña convidado a Pontevedra para ofrecer unha conferencia maxistral sobre o proceso de transformación da cidade. Será o luns no Teatro Metropólitan.
Aproveitando esta visita, que supón unha continuación da realizada durante 2017, Anabel Gulías avanzou que se asinará co secretario de desenvolvemento económico un protocolo de colaboración entre o goberno mexicano e Pontevedra.
Trátase dun acordo bilateral para fomentar comercio, investimento e innovación, empregando relacións de intercambio e desenvolvemento económico, promover acordos para sectores estratéxicos da economía, compartir información e brindar asesoría para materializar proxectos, establecer lazos culturais e comerciais, ademais de fomentar o turismo.
A concelleira destacou o feito de que o modelo de cidade abre portas e potencia a capacidade de crecemento e de posicionamento internacional de Pontevedra.