Ata os 491 casos activos subiu a presión da covid-19 na cidade de Pontevedra. Son, segundo sinalou o goberno municipal, 39 máis que onte. A incidencia acumulada na capital segue crecendo e sitúase, a 14 días, en 539 casos por cada 100.000 habitantes.
A pesar deste crecemento, a situación de Pontevedra está lonxe de ser a peor da área sanitaria. Esa dubidosa honra recae un día máis en Poio, onde a incidencia segue crecendo e superou xa un acumulado de 2.300 casos. Hai, en concreto, 416 casos activos (seis máis).
Na 'lista negra' mantéñense tamén A Lama, Soutomaior e Moraña, os tres cunha incidencia acumulada superior aos 1.000 casos por cada 100.000 habitantes.
O maior incremento prodúcese en Soutomaior, onde os casos activos eleváronse ata os 103, doce máis que onte. En Moraña, pola súa banda, hai 46 contaxiados (un máis).
Preto deles sitúase Meis con 46 casos activos (dous menos) e preocupa a evolución de Sanxenxo, que segue crecendo a marchas axigantadas. Cuntis, que tamén ten unha incidencia superior aos 750 casos, rexistra tres casos menos, ata un total de 33.
Xunto con Pontevedra, nunha pinza de incidencia entre os 500 e os 750 casos por cada 100.00 habitantes, mantéñense como onte Caldas de Reis; Barro, con 20 casos activos (un menos); Vilaboa e Ponte Caldelas. A eles súmase Vilanova de Arousa, con 55 casos activos (cinco máis).
Ata os 160 casos activos (catro máis) aumentan os contaxiados en Vilagarcía de Arousa, unha tendencia á alza que se rexistra tamén en Marín, con 109 infectados (dous máis), en Cambados, con 53 (tres máis); en Bueu, con 44 (catro máis); ou en Ribadumia, con 18 (cinco máis).
Pola contra, Meaño presenta este xoves tres contaxiados menos, cun total de 17. Estes datos sitúano, xunto con O Grove, como os concellos da área sanitaria de Pontevedra e O Salnés coa incidencia acumulada máis baixa de todos eles.
A incidencia acumulada a 14 días de cada municipio, a partir dos datos proporcionados polo Servizo Galego de Saúde, pódense consultar no mapa que acompaña a esta información.