Pontevedra deu este luns un paso máis para retirar todo tipo de honras a persoas relacionadas, dunha ou outra maneira, co réxime de Franco. Así, a corporación municipal aprobou que a rúa Marqués de Valterra pase a denominarse Avenida da Praia de Estribela.
Fíxoo cos votos a favor de BNG, PSdeG-PSOE e o edil non adscrito, Goyo Revenga, ex concelleiro de Cidadáns. Os nove representantes do PP abstivéronse.
Pascual Díaz de Rivera, marqués de Valterra, foi un "militar golpista", segundo sinalou o edil Alberto Oubiña, que lembrou que formou parte da armada "sublevada" contra o goberno da II República e durante a Ditadura ostentou diversos cargos, entre eles, director nacional de pesca.
A súa traxectoria, subliñou o concelleiro nacionalista, demostra que tivo unha "implicación directa" no golpe de estado de 1936 e no "fortalecemento" do réxime franquista. Foi por iso polo que, en 1952, púxose o seu nome á rúa entre Os Praceres e a lonxa de Lourizán.
Oubiña apuntou que, ademais, foi pouco despois de aprobarse os recheos que modificaron a liña de costa entre Pontevedra e Marín "para sempre", enterrando xusto baixo a avenida que se lle dedicou un areal con forma de cuncha que se coñecía como a praia de Estribela.
Este cambio de denominación, segundo o goberno municipal, quere servir tamén como homenaxe ás mariscadoras que loitaron durante anos contra eses recheos "porque entenderon que non traía máis que pobreza e destrución" para o mar.
Desde o Concello destacan a "valentía" destas mulleres, que protagonizaron manifestacións pacíficas e boicotearon os traballos de recheo, sufrindo unha "brutal represión" por parte do exército franquista durante todo este tempo.
"Queremos mostrar o noso respecto pola democracia e o noso desprezo polo golpe militar e polos seus representantes", sentenciou o concelleiro do BNG.