"Non collo na camisa e iso que puxen unha moi grande". Esa expresión de Miguel Fernández Lores resume perfectamente a satisfacción do Concello de Pontevedra ante un novo premio ao seu modelo de cidade. E non calquera premio. Pontevedra foi galardoada co premio Intermodes 2013, que entrega anualmente unha axencia colaboradora da Unión Europea centrada en asuntos de mobilidade intermodal e accesibilidade.
Pontevedra recibe este premio, segundo o comunicado remitido por Intermodes, "pola súa política exemplar" no transporte intermodal de pasaxeiros. Destaca especialmente o proxecto Metrominuto, un plano editado polo Concello de Pontevedra no que se detallan, imitando as liñas do transporte por metro, itinerarios a pé pola cidade e o tempo que se tarda en percorrelos. Cualifícano como "o primeiro mapa peonil en Europa".
"ÿ o resultado final do noso modelo urbano", sinalou Miguel Fernández Lores, quen visiblemente feliz e orgulloso deste recoñecemento, destacou que este premio "é un éxito espectacular". Desvelou que "non houbo ningunha proposta para que Pontevedra fose elixida", senón que foi a propia Intermodes a que escolleu á cidade "polo seu modelo urbano, pola súa peonalización e por facer que os cidadáns poidan disfrutar dela a pé".
Fernández Lores, que dedicou o premio a todas aquelas persoas, políticos e técnicos que "nestes trece anos apostaron por este modelo de cidade", asegurou que este recoñecemento internacional "é un espaldarazo importante". Segundo o alcalde de Pontevedra é a "plasmación práctica da bondade deste modelo", e que supón para o goberno municipal "un impulso para seguir traballando nesta liña".
Pontevedra é a primeira cidade europea en conseguir este galardón. Instaurado en 2009, os anteriores premiados foron proxectos fronteirizos conxuntos da rexión alemá de Lorena e Luxemburgo (2009), do Ródano francés e Suíza (2010) ou do estreito de Oresund, que separa unha illa danesa dunha provincia sueca (2011). O último proxecto recoñecido, en 2012, foi o plan de transporte dos Xogos Olímpicos de Londres.
O premio será entregado durante un congreso que se celebrará en Bruxelas o próximo 6 de febreiro de 2013 e que inaugurará Leo Varadkar, ministro irlandés de Transporte, como representante do país que, nese momento, presidirá a Unión Europea.