O Pazo de Colón de Poio foi escenario este xoves da gala do XIII Premio Xoven Empresario e Iniciativa Emprendedora de Galicia da Asociación de Jóvenes Empresarios (AJE) Galicia.
Unha xornada na que destacou o talento pontevedrés, receptor de tres dos cinco galardóns da gala.
Galiwonders, que xa fora distinguida a nivel local por AJE Pontevedra, foi o proxecto que levou o Premio Xoven Empresario de Galicia. Trátase dunha axencia de viaxes en liña impulsada desde a capital provincial.
Pola súa banda o segundo gran recoñecemento, o Premio Iniciativa Emprendedora de Galicia, foi para unha proposta con sede en Nigrán, Vanetta Vegan Food.
O talento pontevedrés foi recoñecido tamén nos áccesits, recibindo Wildfire Sentinel o de Innovación e a empresa Sembra Biojoyas o de Responsabilidade Social Empresarial. O terceiro dos áccesit, o de Creación de Emprego, foi para Merlín Software (A Coruña).
A gala de AJE contou coa presenza de diversas personalidades como o presidente da Xunta de Galicia, Alfonso Rueda, e da Deputación, Luis López, ademais do alcalde de Poio, Ángel Moldes.