O municipio de Pontevedra despide o mes de agosto con 44 persoas desempregadas máis. Segundo os datos oficiais feitos públicos este martes 4 de setembro na Boa Vila hai 5.419 persoas inscritas nas lista do paro.
Na provincia de Pontevedra o número de parados rexistrados nas oficinas dos Servizos Públicos de Emprego Estatal (SEPE) aumentou en agosto en 1.045 persoas ata sumar un total de 64.001 desempregados.
En Galicia o número de parados rexistrados nas oficinas dos servizos públicos de emprego (antigo Inem) subiu en agosto en 1.012 persoas en Galicia respecto ao mes anterior, ata alcanzar a cifra global un total de 164.424 inscritos
Tamén a nivel nacional subiu o paro en 47.047 persoas en relación co mes anterior, co que acaba cunha sucesión de seis meses consecutivos á baixa.
Desta forma, a cifra total de parados rexistrados sitúase en 3.182.068 persoas, segundo informou este martes o Ministerio de Traballo, Migracións e Seguridade Social.
Este incremento do paro en agosto é superior ao rexistrado o ano pasado ese mes (46.400 persoas).
Cos últimos compases do verán, agosto é tradicionalmente un mal mes para o emprego.