Un ano máis, familiares, amigos, veciños e cidadáns de Pontevedra volverán acudir ata a praza da Ferrería para lembrar a Sonia Iglesias. O 18 de agosto cumpríase o sexto aniversario da desaparición da muller pontevedresa que aquel día en 2010 non acudiu á tenda na que traballaba na rúa Benito Corbal.
Desde entón pouco avanzouse na investigación deste caso ante a desesperación da familia. En abril de 2015, arquivábase a causa, de forma provisional, por falta de probas e a imputación de Julio Araújo, a ex parella de Sonia Iglesias, quedou en nada. A familia continúa sen ter novidades sobre o caso.
Ante esta situación este mércores 24 ás 21.30 horas na praza da Ferrería, os veciños de Pontevedra están chamados a unha nova concentración co obxectivo de que este caso non quede no esquecemento e se siga investigando.