A corporación municipal de Pontevedra aprobou este venres un orzamento de 80,7 millóns de euros para 2021. Fíxoo cos únicos votos a favor dos membros do goberno municipal, BNG e PSOE. O PP opúxose entre duras críticas a estas contas.
O concelleiro de Facenda, Raimundo González, explicou que a situación "excepcional" creada pola pandemia da covid-19 foi "determinante" no deseño deste orzamento, que recolle decisións "drásticas e contundentes" para recuperar a economía.
Tras lembrar que atravesamos unha crise de "grandes dimensións" e que as posibilidades de actuación "non dependen só de nós", González destacou que o Concello poñerá "todos os seus recursos" ao dispor dos programas de reactivación económica.
Será mediante a inxección de liquidez para afrontar novos investimentos, ao entender que " é a única maneira posible de remontar a economía". Así, lembrou que coa incorporación dos remanentes na primavera, mobilizaranse este ano uns 100 millóns de euros.
Durante a súa intervención, o responsable de Facenda sinalou que esta recuperación non pode ser "a calquera prezo", senón que debe ser unha reactivación "verde e non gris", apostando por actuacións ambientais. "Será ecolóxica ou non será", dixo.
O concelleiro nacionalista ha destacado, entre os grandes números deste orzamento, que as taxas e impostos conxeláronse por sétimo ano consecutivo e que Pontevedra atópase entre as capitais españolas cunha menor presión fiscal.
As partidas de persoal e gastos correntes aumentan polo incremento salarial do 0,9% para os empregados públicos e polos gastos derivados da covid-19. Os investimentos directos, ademais, ascenderán nun primeiro momento a preto de 13 millóns de euros.
Raimundo González explicou que de cada 100 euros que gastará o Concello en 2021, 52,9 irán para sufragar servizos públicos básicos. Máis dun 25% serán para medidas relacionadas coa protección social dos cidadáns e "menos dun euro" para débeda pública.
Antes de finalizar a súa intervención, González lamentou o "ridículo espantoso" que protagonizou o PP na tramitación destas contas ao comprobar que "pouco tiñan que aportar" a uns orzamentos que, reiterou, "son expansivos e moi bos".
Os nove edís do PP votaron en contra destas contas. O seu portavoz, Rafa Domínguez, lamentou que o goberno municipal "no se haya dado cuenta" da crise creada pola pandemia e presentasen un orzamento "que no ha cambiado nada".
Domínguez criticou que o orzamento sexa un "corta y pega del año pasado con pequeñas modificaciones" e asegurou que está "absolutamente alejado de la realidad" e das necesidades dos pontevedreses.
Estas contas demostran, a xuízo do portavoz popular, a "absoluta distancia" do alcalde cos cidadáns. "No habla con nadie, no se reúne con nadie y se ha escondido en un despacho todos estos meses", afirmou o xefe da oposición.
Engadiu que a xente en Pontevedra "se está arruinando" e o goberno municipal "no hace absolutamente nada". Para iso, reclamou axudas aos sectores máis afectados pola pandemia, a supresión de taxas e un aumento do gasto social.
Para o PP, concluíu Domínguez, "es sin duda el peor año del alcalde", que segundo dixo "nos ha defraudado a todos".
O edil non adscrito, Goyo Revenga, tamén votou en contra do orzamento municipal de 2021. Participou no pleno de maneira telemática e non quixo intervir no debate.