Pontevedra négase a renunciar á música en directo. A nova lei de espectáculos públicos de Galicia pon francamente difícil que un pequeno local poida programar concertos ou organizar calquera tipo de evento cultural. O Concello prevé sortear esta lexislación cun programa chamado Cabos soltos, cuxos detalles se están ultimando estas últimas semanas.
Con Cabos soltos, o goberno municipal aposta por crear unha marca propia que permita que a actividade cultural privada se siga celebrando baixo o paraugas do Concello. É dicir, a administración converterase en "coorganizador" de toda esta programación para salvar as trabas que crea a lei de espectáculos públicos para a iniciativa cultural privada.
Fontes municipais aseguran que un total de 53 locais de todo o municipio mostraron o seu interese en participar esta iniciativa.
De todos eles, 39 son aptos para organizar concertos e acoller actividades culturais con público. Os técnicos municipais están a realizar as últimas comprobacións para revisar estes establecementos.
Unha vez se complete a listaxe de locais que participarán en Cabos soltos, o Concello traballará nas bases que rexerán este programa e os requisitos que terán que cumprir os que queiran formar parte desta iniciativa.
Asumindo o Concello a responsabilidade desta actividade cultural, os promotores terán que cumprir unha serie de requirimentos, entre eles, un horario determinado, ter un seguro en vigor, respectar a normativa de seguridade e hixiene ou aceptar que as actividades en espazo público poden suspenderse por necesidade municipal.
Ademais, deberán informar ao Concello de todos os eventos que se programen, para que poidan ser publicitados polas canles correspondentes; e deberán reservar un mínimo de actividades para músicos e artistas locais, que serán reunidos nun catálogo que se editará no marco deste programa.
Cabos soltos logrará que a actividade cultural da cidade non se resinta, permitindo que aqueles locais que non teñen licenza de sala de concertos poidan seguir ofrecendo a súa programación habitual.