A Concellería de Benestar Social, que dirixe o socialista Marcos Rey, adheriuse, xunto con outras 40 entidades e institucións, ao Acordo pola Mellora da Saúde Mental Infanto-Xuvenil de Galicia, que ten como meta ofrecer propostas para a mellora dos servizos socio sanitarios e educativos que participan no coidado da saúde mental desde unha visión integral da mesma.
A vocación é a de promover un grande consenso entre a sociedade civil e a gobernanza en todas as súas escalas, especialmente entre os axentes nos eidos sanitario, educativo, social e familiar que estean directamente implicados no traballo diario coa infancia e coa mocidade.
"As medidas a impulsar foron propostas polos axentes sociais destes sectores e consensuadas e priorizadas durante as sesións de traballo que se desenvolveron entre os meses de abril e setembro deste ano.
Estas propostas agrúpanse en torno a catro bloques de necesidades compartidas: máis recursos, con medidas prioritarias como a dotación de Unidades de Saúde Mental nos centros de saúde de Atención Primaria e o reforzo dos equipos das Unidades de Saúde Mental Infanto-Xuvenil estendendo ata os 21 anos a idade de atención; máis coordinación, establecendo un mecanismo de derivación urxente aos servizos de Saúde Mental e creando equipos de coordinación interdepartamental e seguimento de caso; máis prevención, con formación específica de profesorado, familiares, alumnado ou pediatras.
Ademais, reclaman a utilización de instrumentos de detección precoz, intervención breve e derivación a tratamento, e máis previsión, coa incorporación dos factores de risco dos problemas de saúde mental ao Sistema de Vixilancia das Enfermidades Crónicas de Galicia e a implantación de espazos de formación para familiares.
Asemade, o acordo aposta por reforzar os equipos terapéuticos específicos para adiccións, TCA, autismo e outros, reforzar os equipos de orientación nos centros educativos, vivendas comunitarias tuteladas e equipos de atención domiciliaria para casos de problemas graves de conduta, a realización e divulgación dun mapa detallado dos recursos dispoñibles en saúde mental, o fomento de boas praxes na Rede, a creación de programas de axuda entre iguais e de espazos seguros e inclusivos de lecer para a mocidade e a implicación das persoas xoves no coidado da propia saúde mental.