Os veciños de Ponte Caldelas van evitar os desprazamentos a Redondela para realizar os trámites relacionados coas súas propiedades inmobiliarias despois de que o goberno local teña chegado a un acordo coa profesional responsable do servizo do Rexistro da Propiedade para asinar un contrato de aluguer, cun prezo simbólico, que lle permita usar a antiga sede de Turismo, que levaba varios anos sen uso.
Esta medida abarata o custo de aluguer que mantiña a rexistradora da propiedade e, por este motivo, poderá manter o servizo.
A rexistradora comprométese a garantir a continuidade laboral das tres traballadoras que atenden en Ponte Caldelas por medio dunha rotación que as levará tamén a realizar servizos en Redondela.
Este mesmo xoves, o goberno tripartito levará a pleno a desafectación do edificio, que segue inventariado como matadoiro municipal, a pesar de que o seu último uso foi como sede de información turística.
O contrato de aluguer estará condicionado á permanencia do servizo que o Concello de Ponte Caldelas considera moi importante e ao que non está disposto a renunciar. O alcalde Andrés Díaz sinala que o de Ponte Caldelas era o único rexistro que estaba previsto eliminar en toda a provincia, ao non chegar ao mínimo de mil documentos anuais recollido na normativa estatal.