O Concello de Poio porá en marcha unha importante actuación de recuperación e humanización de espazos públicos na parroquia de San Salvador coa que busca impulsar a mellora da mobilidade sostible, a seguridade viaria e a dotación de novos servizos en núcleos como Portosanto, Saíñas e A Puntada.
Para poder executar o proxecto, solicitará fondos do programa ReacPon (Reacciona Pontevedra) impulsado pola Deputación de Pontevedra en favor da recuperación económica e para mitigar os efectos da crise derivada da pandemia da covid-19.
Así o acordou este martes a Comisión de Urbanismo, cos votos a favor dos grupos do goberno local e en contra do Partido Popular.
O concelleiro de Urbanismo, o socialista Gregorio Agís, explicou que o orzamento destes traballos, que terían un prazo de execución de catro meses, ascendería a máis de 900.000 euros. O Concello achegará o 20% do presuposto e o programa Reacpon o 80% restante.
Agís sinala que a actuación vai en consonancia cos proxectos que se están a tramitar ou que xa se impulsaron noutros núcleos do municipio, cos que se busca darlle aos espazos públicos un uso plural e seguro, fomentando mobilidades alternativas e outorgando prioridade aos peóns, ao mesmo tempo que se respectan os muros e construcións tradicionais existentes nestas zonas.
Neste caso en concreto, na memoria do proxecto figura a dotación dunha plataforma única, con superficie de pedra, para garantir a seguridade viaria. Apóstase por reducir a velocidade a 30 quilómetros por hora e se contempla, asemade, implantar o sentido único nalgunhas rúas que contan cunha anchura moi reducida, o que dificulta, en moitas ocasións, o tránsito de vehículos e peóns. Ademais, o tráfico en varios lugares estaría restrinxido a residentes ou servizos, co que se acadaría unha importante redución de emisións de CO2.