Incontrolable. Así recoñecen as autoridades sanitarias que é a situación que se rexistra en Poio. Lonxe de mellorar os datos, a incidencia da covid-19 segue crecendo de maneira alarmante e o municipio parece abocado a situarse no nivel de alerta extremo.
En Galicia, este nivel tan só está activo en tres concellos: Arteixo, Viveiro e Xinzo, que teñen unha incidencia acumulada que supera os mil casos por cada 100.000 habitantes.
En todos eles, a hostalería está pechada (só se permite servir a domicilio) e a actividade está restrinxida tan só a servizos esenciais. Os encontros quedan reducidos só a conviventes.
Pois ben, Poio superou con creces esa barreira. Os 248 casos detectados nos últimos 14 días elevaron a incidencia acumulada neste período ata os 1.451 casos por cada 100.000 habitantes. A sete días, os datos non son mellores: 1.147 casos.
A día de hoxe, Poio conta con 274 casos activos. Son 73 máis que onte e, segundo Sanidade, estas cifras aínda poderían crecer nos próximos días, tras contabilizarse os resultados dos cribados realizados no Vao ou entre o sector marisqueiro.
Ante este panorama, o alcalde Luciano Sobral volveu insistir ante as autoridades sanitarias, coas que mantivo unha conversa telemática este xoves, na necesidade de reforzar os cribados masivos no municipio porque "é evidente" que os niveis de Poio "sobrepasan" aos da área.
"Os datos son preocupantes e, por moito que queiramos ser optimistas e desexemos que a curva empece a baixar pronto, todo apunta a que estamos abocados a ese peche", lamentou Sobral, que entende que "pode que non haxa outra saída".
O alcalde advirte que se están detectando cada vez máis casos en centros educativos e os centros de saúde "están a soportar moita presión", polo que insistiu en que "agora máis que nunca temos que ter a disciplina suficiente para autoconfinarnos".
Desde o goberno municipal piden á veciñanza que só saian da casa para traballar e facer xestións imprescindibles, evitando contactos con persoas que non sexan conviventes.