A caída de varios exemplares durante o pasado inverno no parque e o paseo de Baltar, en Portonovo, levou ao goberno municipal de Sanxenxo a abordar un plan de choque para os piñeiros que hai en todo este ámbito, debido ao estado no que se atopan.
Dous informes encargados á Estación Fitopatolóxica do Areeiro revisaron todos os exemplares de piñeiros que hai en Baltar, aconsellando dúas actuacións diferentes.
No parque de Baltar, entre o campo de fútbol e o pavillón, os técnicos recomendan eliminar a totalidade dos piñeiros, xa que "pola súa arquitectura esfiada e polas inadecuadas relacións entre copa e fuste e altura e diámetro teñen certo risco de rotura ou caída".
No informe, recoñecen que é a opción "máis agresiva", pero é a que se debe considerar para poder eliminar a posibilidade de que poidan causar dános a persoas ou a infraestruturas.
Unha vez retirados os exemplares, deseñarase unha repoboación con árbores ben distanciadas para que crezan dunha forma correcta.
En canto ás especies frondosas, á parte dos labores típicos de vixilancia, recomendan trasplantar algúns dos pés que están próximos, sanear os cortes de poda mal realizados e aplicar despois do novo o corte unha pasta feita a base dun fungicida de cobre.
O informe realizado sobre o piñeiral do Paseo de Baltar recomenda, pola súa banda, reestruturar as copas máis inestables e con ramas secas realizando podas en forma de bisel, sanear as ramas de grandes dimensións e ir eliminando progresivamente as árbores con arquitectura máis deficiente a nivel estrutural para permitir o crecemento dos exemplares.
Tamén se expón retirar o tronco en forma de cadeira para evitar a atracción de fungos patóxenos que poida poñer en perigo ao conxunto do arboledo. Ademais, proponse destruír todos os restos de poda e tratar as cicatrices cun funxicida.