Para esta nova entrega de "A cociña gourmet en conserva", Conservas Pescamar propónnos unha receita que incorpora un dos produtos máis prezados das nosas costas e que forma parte da súa gama gourmet: as zamburiñas das rías en salsa de vieira con aceite de oliva.
As zamburiñas son un manxar para o padal e moi valoradas nutricionalmente pola súa alta composición en proteína e a inexistencia de graxas. Ademais, entre os minerais, destaca a achega de fósforo, potasio, calcio e ferro.
A 'piadina' (ou piada) é un prato típico das provincias italianas da Romaña, na Rexión Emilia- Romaña. Consiste nun pan plano elaborado con fariña de trigo e que se presenta dobrado pola metade e recheo de diferentes ingredientes. Neste ocasión, imos preparar a variedade coñecida popularmente como a piedizza, chamada así por presentar o recheo estendido sobre unha das súas caras, como unha pizza.
Para preparar estas deliciosas 'Piadinas' con paté de zamburiñas Pescamar necesitamos os seguintes ingredientes:
- 2 latas de zamburiñas das rías en salsa de vieira con aceite de oliva
- 200 g de queixo cremoso
- 100 g de maionesa
- 10 olivas recheas de anchoa
- 500 gramos de fariña de trigo
- 15 gramos de sal fino
- 75 ml de aceite de oliva virxe extra (ou graxa de porco)
- 1 culleradiña de bicarbonato sódico
- 200 ml de auga
Preparación do paté de zamburiñas:
Vertemos o contido das latas de zamburiñas das rías en salsa de vieira con aceite de oliva nun coador colocado sobre un vaso para que se escorra parte do aceite (non a salsa espesa).
A continuación, mesturamos o contido das latas de zamburiñas que nos quedou no coador co queixo cremoso e a maionesa. Batemos ata obter unha crema mesta.
Aparte, cortamos as olivas en anacos moi pequenos e engadímolos á mestura anterior ata que formen unha pasta consistente.
Elaboración das 'piadinas' (6 unidades):
Para preparar a masa, mesturamos a fariña co sal e o bicarbonato nun bol. Formamos un oco no centro e vertemos aí o aceite e a auga a temperatura ambiente (se fai moito frío, amornaremos antes lixeiramente a auga).
Amasamos ata obter unha textura homoxénea, pero non pegañenta. Podemos mesmo rectificar cunhas culleradas de auga no caso de que a fariña estea moi seca e solta. Formamos unha bóla, tapamos cun trapo e deixamos repousar a masa unha hora.
Separamos a masa en seis porcións iguais. Para formar cada 'piadina', amasamos un pouco cada porción, formamos bólas, esmagamos e estiramos cada unha cun rodete ata deixar un grosor de aproximadamente medio centímetro. Picamos cun garfo para que non se formen burbullas ao cociñalas.
Quentamos unha tixola antiadherente a lume medio-forte, engraxamos cun pouco de aceite (ou se o preferimos, coa graxa de porco) e cociñamos cada unidade entre 1 e 2 minutos por cada lado, con atención para que non se queimen.
Presentación:
Conforme se van facendo, colocamos as 'piadinas' unhas sobre outras e o paté de zamburiñas das rías en salsa de vieira con aceite de oliva entre capa e capa. Podemos decorar, como nas fotografías, cunhas follas de alfábega e uns anacos de tomate.
En dúas semanas, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.