Galicia quere xestionar o seu litoral e, tras o acordo unánime alcanzado no Parlamento galego para reclamar ao Estado a xestión das competencias sobre o seu dominio público marítimo terrestre, ese mesmo consenso reproduciuse en Pontevedra.
O pleno da corporación municipal aprobou por unanimidade unha moción presentada polo PP, modificada cunha emenda de BNG e PSdeG-PSOE, na que se reclama a transferencia a Galicia da xestión e da ordenación do seu litoral.
A edil Pepa Pardo sostivo que Galicia quere encargarse do seu propio litoral, como fan outras comunidades como Cataluña ou Andalucía, algo que considera "fundamental" para dar unha maior seguridade xurídica ás empresas da cadea mar-industria.
Pardo asegura que moitos dos investimentos previstos nestas compañías vinculadas coa actividade marítima "están en riesgo" ante a xestión "nefasta" que realiza ao Goberno central, ao que instou a "apartarse" e deixalas en mans da Xunta, á que ve "eficaz y eficiente".
A pesar do voto favorable, as críticas dos populares foron contestadas polo socialista Tino Fernández, que lembrou que no últimos trece anos, con Núñez Feijóo á fronte, a Xunta non conseguiu ningunha transferencia fronte ás doce do bipartito "en tres anos e medio".
"O único risco para o dominio público marítimo terrestre é que vostedes sigan gobernando en Galicia", asegurou Fernández, que lamentou a "mentira repetida" polo PP.
A eles retoulles a que "digan un exemplo" dunha concesión de industrias vinculadas co mar que fose eliminada polas novas leis estatais.
Desde as filas do BNG, Carme da Silva engadiu que ao Estado hai que pedirlle non só a xestión senón tamén a ordenación do litoral "se o que se pretende é ter un marco xurídico estable para Galicia feito para Galicia".
Dentro desta "campaña de confusión" do PP, Da Silva deixoulles claro que esta medida afectaría as empresas con actividade na lámina de auga e "non para que Ence se quede".
MELLORAS EN FONTESANTA
Tamén por unanimidade se aprobou a iniciativa do PP que reclamaba medidas urxentes ante a situación "muy deficiente", segundo o edil Pablo Fernández, na que se atopa o barrio de Fontesanta, cuxas demandas "siempre caen en el olvido".
Tras destacar o concelleiro responsable de Obras, Demetrio Gómez, que se está actuando nel, acordaron aprobar a moción que, entre outras cuestións, recolle actuacións para mellorar a sinalización das rúas ou o aumento da limpeza e da frecuencia de recollida de lixos.
O mantemento das zonas verdes está incluído no novo contrato de xardíns, que se asinarán este mes, continuarase humanizando o barrio e Pontevedra pedirá a ADIF a cesión dunha parcela para poder construír un novo parque infantil na zona.