Este final de marzo e o inicio do mes de abril virán marcados pola presenza habitual de precipitacións nas Rías Baixas.
Este xoves festivo, 28 de marzo, as Rías Baixas continúan baixo a influencia da borrasca Nelson, centrada en Irlanda. Manteranse intervalos nubrados con precipitacións persistentes e xeneralizadas nas horas centrais do día, máis abundantes no sur de Galicia.
A cota de neve subirá nas horas diúrnas e baixará de novo a 1.000 metros a últimas horas da xornada. As temperaturas situaranse entre 8 e 11 graos con ventos que soprarán do suroeste, con intervalos fortes na provincia de Pontevedra durante a tarde, segundo as previsións do servizo de Meteogalicia.
Durante o venres 29 tamén se manterán os efectos da borrasca situada ao noroeste de Irlanda. Estableceranse intervalos nubrados con chuvascos intermitentes máis probables durante a mañá e no oeste de Galicia. As temperaturas moveranse entre 7 e 13 graos. O vento soprará do oeste-suroeste, moderado no litoral.
Tamén o sábado 30 continuará a mesma configuración atmosférica desta semana Santa, con baixas presións centradas en Irlanda. Os ceos seguirán nubrados nas Rías Baixas con chuvascos que entrarán polo sur, máis intensos e abundantes durante a tarde. A cota de neve baixará ata os 1.000 metros durante a noite. As temperaturas continuarán sen apenas cambios, entre 7 e 12 graos. Os ventos soprarán de sur fortes durante a mañá e cambiando a frouxos de oeste ao longo do día.
Na xornada do domingo e no inicio da primeira semana de abril, as baixas presións e os ventos do suroeste serán a tónica xeral en Galicia, con alta probabilidade de choiva, superando o 80 por cento ata o xoves. As temperaturas presentaranse algo máis suaves.