Do mesmo xeito que levan anos facéndoo cos restaurantes, a Guía Michelin creou unha distinción para recoñecer o que denominan experiencias hostaleiras e de viaxe excepcionais. Son as novas Chaves Michelin que, na súa primeira edición, xa se fixaron nas Rías Baixas.
O hotel-restaurante de Pepe Vieira en Raxó (Poio) foi distinguido con dúas Chaves Michelin, situándose como o establecemento hoteleiro máis valorado en Galicia.
Segundo os inspectores destes premios, algúns hoteis enfocados á gastronomía "van ao seguro" no que respecta a as súas habitacións, "convencidos quizá de que o gusto pola gastronomía de vangarda está rifado co gusto pola hotelaría de última xeración".
Pero subliñan que o de Pepe Vieira "parte do principio de que, se conseguen namorar coa súa proposta gastronómica, nada lles impedirá namorar co seu modo de entender a hotelaría", partindo da "excelencia culinaria" do seu propietario.
Os inspectores destacan que este hotel "aproveita ao máximo a inmersión en plena natureza", con habitacións "que convidan a esquecer o luxoso e sobrio interior de estilo minimalista para abismarse na contemplación da paisaxe a través da súa inmensa ventá"
Así, dentro dunha "experiencia difícil de esquecer", conclúen que os "galpóns" en forma de cubo que acollen as habitacións "reúnen todas as comodidades desexables e demostran que o minimalismo estético non é incompatible co luxo na súa máxima expresión".
DOUS HOTEIS MÁS RECOÑECIDOS EN GALICIA
O conxunto que forman o hotel e o restaurante que Pepe Vieira ten en Raxó non é o único establecemento de hospedaxe en Galicia que se coa nesta selecta lista.
Tamén o Casa Beatnik Hotel, en Vedra (A Coruña), lucirá dúas Chaves Michelin; mentres que A Quinta da Auga (Santiago de Compostela) terá un destes novos distintivos de calidade.
En total, a selección de hoteis da Guía Michelin 2024 en España inclúe 97 establecementos, cinco deles con tres chaves, doce con dúas chaves e 80 cunha chave.