Chega unha nova entrega da serie "A cociña gourmet en conserva", da man de Conservas Pescamar. Nesta ocasión, imos preparar uns Pementos do piquillo recheos de brandada de bacallau, indicados para entrante ou como prato principal, se desexamos un menú lixeiro.
O bacallau é un peixe branco con múltiples propiedades. Destaca a súa achega en proteínas, superior á dalgunhas carnes. É un peixe moi axeitado para dietas de control de peso, por ser baixo en calorías e en graxas. As graxas que achega son en forma de omega 3, moi beneficiosas para a saúde cardiovascular.
A brandada é un prato orixinario da cociña catalá, que se elabora con bacallau esmiuzado, mesturado con leite, aceite e allo ata que adquire unha consistencia cremosa.
Para preparar uns deliciosos Pementos do piquillo recheos de brandada de bacallau Pescamar, necesitamos os seguintes ingredientes:
- 2 latas de Bacallau á biscaíña de Conservas Pescamar
- 2 pementos do piquillo por persoa
- 2 dentes de allo
- Medio vaso de leite
- 1 ou 2 culleradas de fariña
- Medio vaso de caldo de peixe ou unha pastilla de caldo
- Aceite de oliva e sal
Preparación:
Cocemos os pementos. Retiramos a unha fonte e reservamos.
Nunha tixola sofriximos o allo picado moi miúdo. Cando estea dourado, agregamos a fariña removendo continuamente para evitar que se toste. Engadimos o caldo e o leite quentes, aos poucos, sen deixar de remover ata conseguir unha crema. Incorporamos o Bacallau á biscaíña de Conservas Pescamar, previamente escorrido (reservamos o mollo das latas para despois) e esmiuzado. Mesturamos ben e deixamos cocer de 3 a 5 minutos. Apartamos do lume e, cando empece a arrefriar, recheamos con esta mestura os pementos.
Ao mollo das latas que reservamos, engadimos unhas culleradas de caldo de peixe e un pemento do piquillo cocido. Pásase pola batedora ata conseguir unha salsa non moi espesa. Poñemos case toda a salsa no fondo dunha fonte, colocamos sobre ela os pementos recheos e regamos por riba co prebe restante.
En quince días, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.