A raíña de corazóns de Alicia no país das marabillas é coñecida, sobre todo, por pedir aos seus soldados que lle cortasen a cabeza a todos aqueles que non seguían as súas ordes ou a molestaban levándolle a contraria.
Así ven desde En Marea ao presidente do Goberno en funcións, Mariano Rajoy, ao estar a tomar decisións que prexudican aos galegos como a prórroga concedida a Ence para seguir na ría ata 2073.
"Rajoy é unha especie de raíña de corazóns que non deixa de dicir que a todo o mundo se lle corte a cabeza ", sinalou hoxe a deputada Ángela Rodríguez, que identificou ás rías galegas como algunhas das súas vítimas.
Só con esa metáfora enténdese, explicou nunha rolda de prensa celebrada en Pontevedra, como nos últimos meses vivíronse situacións "surrealistas" como o feito de que un goberno en funcións aprobase a prórroga a Ence, pero destacou que "aos poucos a realidade vai gañando peso" e a cidadanía "xa non está disposta a aceptar unha serie de condicións".
Por iso, En Marea asegura estar "a quentar motores" para unha "segunda volta" electoral na que os cidadáns "teñen que desempatar" entre o "medo e a esperanza" que poderían achegar, por unha banda un goberno "inmobilista" e por outro un executivo "do cambio".
A deputada de En Marea lamentou que a prórroga de Ence non fose un "problema resolto" ao non haber un goberno "que puidese afrontar estas cuestións", polo que avanzou que o seu partido trasladará de novo ao Congreso este asunto "con máis forza" cando se inicie a nova lexislatura.
Antón Gómez Reino, tamén deputado en Madrid, reiterou que a situación da ría de Pontevedra con Ence "preocupa a todos os galegos" e por iso fixo un chamamento á participación cidadá na manifestación que se celebrará este sábado en Pontevedra para esixir a revogación da prórroga concedida polo goberno.